Faraana ñannde 22 yarkoma – Saare ka jaalibawol tubbi ɗon ñallii e nder welo-welo mawngo sabu timmbugol mahugol ƴanngal jogindirayngal lare saare nden. Ngal kuugal mawngal no ɓanngini faandaare Ardiiɗo Hawtaandi Gine ndin Seneral Maamadii Dummbuyaa, fii leydi Gine humondirndi e yurmondirndi.
Ko ardii kuugal ngal ko Koohoo Aamadu Wuuri Bah wonndu e Ardiiɗo Mbatu Mawngu ngun ka CNT Doftooru Dansaa Kurumaa e wonnde e huɓindiiɓe buy e luujondirteeɓe e banŋe ñeeñal maa e banŋe jawle.
Ko ƴanngal ngal jarata ko miliyaaruji 170 mbuuɗi faran Gine e dow ballal huuwondiral leydi Sapon ndin. Junndi ƴanngal ngan Faraana ko meeterji 70 e meeterji 17 yanji wonndude e laawon ngol meeteerji 503. Dummunne kasinngol golle ɗen ko lebbi 24.
Ardiiɗo laral ngal Seneral Bunndukaa Konde jarnuno faandaare nden, ɓanngini « ko kuugal mawngal timmbaa ɗoo » e hoore himo anndintina giggol ngol Ardiiɗo leydi ndin joganii saare Faraana nden e jamaa mun on.
Yaakitoraaɗo golleeji ngenndi ndin Laye Seku Kamaraa hollii wonnde golle ɗen fuɗɗoto woni kisan e kadi toppitagol ɗate Maamun-Faraana e Faraana-Daabolaa kadi ko kisan sabu hiɗe tawaa e newinayɗe yulirɗe ngenndi ndin.
Yaakitoraaɗo eɓɓooreeji e huuwondire ngenndi ndin Moodi Isma’el Naabee kañun anndintinno wonnde Faraana ko leydi taarika, ndimu e wurnital. O watti ɗon wonnde ngal ƴanngal no yawti kuugal ñeeñal : « ko ngal maande humindirnde hakkunde ligotooɓe e yerirɗe kesse e banŋe faggudu »
Jaagorɗo Sapon on Kohoo Kato Riyuisii heyɗintinii angisannde leydi makko ndin e ɗowtugol Gine e kala kuugal ɓantal ngal leydi ndin timmbi. O anndintini wonndema huuwondiral Sapon e Gine no humii e tugaale tati no e ɗen timmbugol yulirɗe wano ɗate e ƴanɗe.
Ka fuɗɗagol golle ɗen, Ardiiɗo yaakitoraaɓe ɓen holluno wonnde ngal ƴanngal ko humindirngal lare saare nden ɗiɗi. hingal humindiri nano e ñaamo. O weltanii Ardiiɗo Hawtaandi ndin ko tawi kon Faraana no immitaande.
Ka lannoode, e innde jamaa Faraana on, mawɗo musidal ngal weltanino Ardiiɗo Hawtaandi ndin sabu balle ɗe o woni e juhirde Faraana ɗen. Be watti wonnde hiɓe toroo mo tawegol ka suɓo-suɓo aroowo fii ardagol hawtaandi ndin e bowte 2025 wonndude e ballal jawdi ko barkiɗi.
Cellule de Communication
